១. ការតមអាហារដើម្បីសម្រកទម្ងន់
មិនចាំបាច់បង្អត់អាហារឬបន្ថយការញាុំ តែគួរផ្តោតទៅលើបរិមាណសារជាតិចិញ្ចឹមជំនួសវិញ ដូចជាបន្ថែមបរិមាណប្រូតេអុីន។ ជាពិសេសនៅតែអាចញាុំជាតិម្សៅ និងជាតិស្ករមុនពេលហាត់ប្រាណបានផងដែរ។ ការញាុំម្សៅគួរតែជាជាតិម្សៅដែលមានការរំលាយយឺត ដូចជានំប័ុងស្រូវសាលីជាដើម។ បន្ទាប់ពីធ្វើលំហាត់ប្រាណលោកអ្នកក៏អាចញាុំបានដែរ តែអ្វីដែលគួរប្រយ័ត្នគឺកុំញាុំច្រើនពេកនៅថ្ងៃដែលមិនបានហាត់ប្រាណ។
២. ហាមញាុំនំផ្អែម ឬ បង្អែមនេះនោះ
ការពិតទៅយើងអាចញាុំបានគ្រប់យ៉ាងដោយមិនចាំបាច់ទ្រាំអត់ញាុំរបស់ដែលយើងចូលចិត្ត។ មិនថាការ៉េម នំខេក។ល។ អ្វីដែលសំខាន់គឺត្រូវញាុំក្នុងបរិមាណសមរម្យដើម្បីកុំអោយលើសជាតិម្សៅនិងស្ករ។
៣. ញាុំផ្លែឈើជួយសម្រកទម្ងន់
មិនមែនផ្លែឈើគ្រប់ប្រភេទសុទ្ធតែញាុំហើយស្គមឯណា ផ្លែឈើមួយចំនួនមានជាតិស្ករច្រើនណាស់ ជាពិសេសផ្លែឈើដែលមានសភាពទន់ ឬ ជ្រាយ។ យល់ល្អគួរញាុំផ្លែឈើណាដែលមានសាច់រឹងដូច ជាត្របែក ប៉ោមខៀវ ក្រូចជាដើមព្រោះផ្លែឈើទាំងនេះមានជាតិស្ករទាប ថែមទាំងជួយប្រព័ន្ធរំលាយអាហារបានទៀតផង។
៤. ចំនួនគីឡូនៅលើជញ្ជីងបញ្ជាក់ថាស្គម ឬ ធាត់
ចំនួនគីឡូលើជញ្ជីងមិនមែនសុទ្ធតែអាចបញ្ជាក់បានថាយើងស្គមឬធាត់នោះទេ សំខាន់បំផុតគឺភាពសមាមាត្ររបស់រាងកាយ។ជួនកាលហាត់ប្រាណហើយតែគីឡូមិនស្រកក៏មាន ប៉ុន្តែរូបរាងមើលទៅសមសួនជាងមុន មូលហេតុដោយសារជាតិខ្លាញ់ដែលមានក្នុងរាងកាយវារលាយតែបង្កើនជាសាច់ដុំជំនួសវិញ។ ព្រោះដូច្នេះហើយចូរកុំបារម្ភនឹងរឿងឡើងគីឡួតែម្យ៉ាងពេក គួរមើលទៅលើបំរែបម្រួលរាងកាយគួបផ្សំផងដែរ។
៥. ញុាំប៉ុណ្ណាដុតចោលអោយអស់…
ក្រោយពីសម្រុកញុាំៗៗៗរហូតឆ្អែតឆ្អន់… ដឹងខ្លួនម្តងទៀតចាប់ផ្តើមមានអារម្មណ៍ថាស្តាយក្រោយ។ មានមនុស្សជាច្រើនរកវិធីអោយខ្លួនឯងសប្បាយចិត្តដោយការចូលក្លឹបហាត់ប្រាណ គិតតែពីរត់ៗៗ ហើយមើល តួរលេខនៅលើអេក្រង់ចង់ដឹងថាដុតថាមពលអស់ប៉ុន្មានហើយ ការពិតការដែលយើងរត់យូរពេកឬរត់បែបលឿនរហូតអាចធ្វើអោយកជើងរបស់យើងមានរបួស ជាពិសេសអ្នកដែលមានទម្ងន់ច្រើន ឯលទ្ធផលដែលបង្ហាញលើអេក្រង់ក៏មិនមែនថាត្រូវទាំងអស់ដែរ។ការរត់ដែលត្រឹមត្រូវគួររត់បែបលឿននិងយឺតឆ្លាស់គ្នា ព្រោះវាធ្វើអោយការទាញថាមពលពីរាងកាយមកប្រើមានភាពពេញលេញច្រើនជាង។ ម្យ៉ាងការធ្វើបែបនេះរាងកាយនៅតែអាចបន្តដុតថាមពលបានបន្ទាប់ពីលោកអ្នកហាត់ប្រាណរួច។
៦. មួយថ្ងៃៗអង្គុយរាប់តែចំនួនកាឡូរី
មិនចាំបាច់អង្គុយរាប់អីដល់ថ្នាក់ហ្នឹងទេលោកអើយ!មើលត្រឹមថាពេលអាហារនីមួយៗអ្នកញុាំអ្វីចូលខ្លះ ជាតិម្សៅ ជាតិខ្លាញ់ ឬស្ករច្រើនពេកអត់? វីតាមីន ប្រូតេអុីនគ្រប់គ្រាន់ឬអត់?ប៉ុណ្ណឹងទៅបានហើយ។
៧. ហាមញុាំគ្រឿងស្រវឹង
ទោះបីការមិនញុាំគ្រឿងស្រវឹងជារឿងល្អចំពោះសុខភាពក៏ដោយ តែម្តងម្កាលក៏ចង់ចេញទៅជួបជុំជាមួយមិត្តភក្តិខ្លះដែរ។ មិនបាច់មានអារម្មណ៍ថាខុសឆ្គងអីទេ បើញុាំក្នុងកម្មវិធីសំខាន់ៗយូរៗម្តង ទោះបីកំពុងសម្រកទម្ងន់ក៏អាចញុាំបានដែរ តែមុនញុាំគ្រឿងស្រវឹងគួរញុាំអាហារដែលមានប្រូតេអុីនមុនសិន ជាពិសេសញុាំត្រឹមល្មមកុំច្រើនពេក។
៨. យ៉ាងណាត្រូវតែញុាំអាហារពេលព្រឹក
អាហារពេលព្រឹកជាពេលដែលសំខាន់បំផុតក៏ពិតមែន តែវាមិនមែនមានន័យថាទាល់តែញុាំម៉ោង៧ ឬ៨ព្រឹកឯណា ព្រោះមានអ្នកខ្លះញុាំអាហារពេលល្ងាចយប់ជ្រៅ។ ចន្លោះពេលរវាងអាហារពេលព្រឹកនិងល្ងាចគួរឃ្លាតគ្នាពី១២ទៅ១៤ម៉ោង ដើម្បីទុកពេលវេលាអោយរាងកាយបានសម្រាកខ្លះ បើអាចទៅរួចគួរកុំញុាំអាហារពេលល្ងាចយប់ជ្រៅពេក។
៩. ពេលវេលាសាកសមសម្រាប់ការហាត់ប្រាណ
ពេលវេលាដែលសាកសមក្នុងការហាត់ប្រាណបំផុតគឺម៉ោង៤ល្ងាច តែជីវិតពិតម៉ោង៤ល្ងាចម្នាក់ៗនៅកន្លែងធ្វើការនៅឡើយ ផ្លូវស្ទះផងអីផងហួសម៉ោងល្មម។ ការហាត់ប្រាណមិនចាំបាច់ថាទាល់តែម៉ោង ៤ល្ងាចទេ អាចហាត់ម៉ោងផ្សេងបាន បន្តែសម្រាប់អ្នកហាត់ប្រាណពេលព្រឹកមិនគួរបណ្តោយអោយ ពោះរបស់អ្នកនៅទទេរជាដាច់ខាត គួររកអ្វីញុាំមុនហាត់ប្រាណជានិច្ច។
